Santiago Rugby Club

Na Galipedia, a Wikipedia en galego.
Saltar ata a navegación Saltar á procura
Santiago Rugby Club
Nome completo Santiago Rugby Club
Alcume(s)
Fundación 2007
Localización Santiago de Compostela
Estadio(s) Campo de Marrozos
Capacidade
Presidente José Pérez de Vallejo
Adestrador Francisco López (masculino)
José Rey (femenino)
Capitán Juan Parga Martín
Máx. Anotador Fikremariam Mendoza (103 p)
Máis ensaios José Valdivia (9 e)
Liga LGR2
Tempada 2017-18
Posición 3º (semifinais)
Páxina web oficial
Na súa casa
Fóra

O Santiago Rugby Club é un equipo de rugby de Santiago de Compostela que compite na segunda división da Liga Galega de Rugby na tempada 2017-18. O equipo disputa os seus encontros como local no campo de fútbol de Marrozos.

O club é o herdeiro da antiga tradición rugbística que existe na capital galega, e que no seu tempo estivo representada sobre todo polo equipo universitario. Despois de varios anos sen equipo de rugby na cidade, en 2007 fundouse o Gallaecius Rugby Club, que en 2011 trocou o seu nome polo actual Santiago Rugby Club.

Precedentes[editar | editar a fonte]

O rugby entrou en Galicia a finais do século XIX a través de buques estranxeiros (principalmente ingleses) que facían escala en portos como Vigo, A Coruña, Ferrol ou Vilagarcía, e cuxas tripulacións eran en moitos casos recibidos coa celebración de eventos culturais e exhibicións deportivas que podían incluír encontros de rugby xogados polos propios tripulantes coa colaboración ocasional de deportistas locais. Está popularmente aceptado que o 2 de marzo de 1911 as tripulacións dos buques “HMS Gloucester” e “HMS Liverpool” terían xogado na Coruña non só o primeiro encontró de rugby de Galicia [1] senón tamén de toda España [2], malia que hai varios documentos que testemuñan a práctica do rugby en Galicia cando menos dende 1895). Pero trala marcha dos buques non quedaba ningunha estrutura que dese continuidade á práctica deste deporte entre a poboación galega.

En Santiago de Compostela, a 35 quilómetros do mar, non hai constancia de que se xogara ó rugby até mediados dos anos 1930's. Foi no contexto da Universidade de Santiago de Compostela onde unha serie de estudantes comezou cos adestramentos na Residencia, dirixidos polo catedrático de ciencias catalán Fernando Calvet Prats[3][4], que practicara o rugby durante a súa estadía de tres anos en Oxford.[5] En novembro de 1934 foi elixido o estudante de medicina Xerardo Fernández Albor como encargado de levar a cabo os trámites para constituír oficialmente o primeiro club universitario [6].

A ausencia doutros equipos en Galicia supuxo que non houbera encontros oficiais até o 26 de abril de 1936, cando se xogou o primeiro encontro de rugby do que se ten constancia en Santiago de Compostela[7]. Na residencia universitaria enfrontáronse os equipos representativos das facultades de Ciencias e Medicina, gañando o de Medicina.[8]

Trala Guerra Civil o Sindicato Español Universitario "SEU" convocou a formación de equipos en diferentes cidades de Galicia para participar nos Campionatos Nacionais Universitario, prosperando en Santiago de Compostela e Vigo a partir de 1942. Ese ano o RC Deportivo creara na Coruña un equipo para disputar un encontro amigable fronte a un equipo de León pero non tivo vida máis aló daquel 28 de xuño de 1942[9], quedando sós os equipos De Santiago e Vigo. O 28 de marzo de 1943 o equipos do SEU Vigo e do SEU Santiago enfrontáronse nun encontro de preparación no Estadio Municipal de Balaídos (primeiro encontro dos santiagueses fora da súa cidade) gañando o equipo vigués por 11-3[10]. O 2 de maio de 1943, esta vez no Stadium da Residencia, o SEU Santiago gañou ó SEU Vigo polo mesmo resultado de 11-3 nun encontro valedeiro para o Campionato Nacional[11] (primeiro encontro e primeira vitoria en competición oficial). Oito días despois, o 10 de maio de 1943, o SEU Santiago perdía na seguinte fase do torneo por 15-3 contra o equipo de rugby do Real Madrid [12]. Aquel foi o primeiro encontro dun equipo de rugby santiagués contra un equipo de fora de Galicia. A primeira vitoria contra un equipo non galego chegou o 27 de febreiro de 1944 cando o SEU Santiago derrotou ó SEU Valladolid por 15-3.[13]

Durante décadas mantívose a rivalidade do equipo universitario cos diversos equipos existentes en Vigo (SEU, Alerta, Celta, Traviesas, Balaídos, Turista, etc) pola supremacía do rugby galego e polos títulos de liga e copa, mentres que a nivel local as facultades de Ciencias, Medicina, Dereito, etc seguían enfrontándose polos campionatos de distrito. En 1962 o campionato galego contou por vez primeira con dous equipos de Santiago de Compostela: por unha banda o clásico Club Universitario (así chamado dende 1952) e por outra a nova sección de rugby da acabada de fundar Sociedade Deportiva Compostela, que tivo unha curta vida.

En 1983 o Club Deportivo Universitario "CDU" foi un dos cinco clubs fundadores da nova Federación Galega de Rugby acadando esa tempada 1983/84 o título de liga. Na seguinte tempada participou na Primeira Nacional acadando un sexto posto no Grupo Noroeste integrado por equipos de Cantabria, Asturias, Galicia e Castela e León.[14] Foi a derradeira vez que un equipo de Santiago de Compostela participou en competicións nacionais.

Superado principalmente polos equipos de Lugo, A Coruña e Vigo, o CDU foi perdendo presenza pouco a pouco. En 1990 apareceu un novo club na cidade, o Compostela Rugby Club, que foi medrando ate acadar o título da Liga Galega de Rugby na tempada 1995/96. Malia iso, nin CDU nin Compostela tiñan equipos debaixo da categoría sénior, e o número de xogadores decaeu progresivamente ate que na tempada 2004/05 non foi posible que saira a competir ningún equipo da cidade, sendo o efémero ADX Ferro o último equipo santiagués que participou en competicións oficiais antes da fundación do Santiago Rugby Club.

Traxectoria[editar | editar a fonte]

Dende a súa fundación, o Santiago Rugby Club non participou en competicións oficiais ate a tempada 2010-11, ano no que debutou na liga galega de rugby, na que acadou o subcampionato no torneo entre 7 equipos, aínda co nome Gallaecius RC. Ese ano non disputou a Copa Xunta, pero si a primeira edición do Circuíto galego de Sevens, rematando o torneo na 6ª posición entre 12 participantes.

Na tempada 2011-12, co novo nome, repetiu a súa participación na Liga Galega, competindo fronte a outros 11 conxuntos, rematando na oitava posición. Na tempada 2012-13 a liga contou con dúas divisións, e o Santiago Rugby Club quedou encadrado no grupo de segunda división. O resultado da tempada foi un quinto posto entre sete equipos.[15] Na tempada 2013-14 competiu novamente na segunda división galega, rematando no último posto.

Traxectoria do equipo sénior masculino
Categoría 2017-18 2016-17 2015-16 2014-15 2013-14 2012-13 2011-12 2010-11 2009-10 2008-09 2007-08
Div.Honra
Div.Honra B
1ª Nacional
1ª Galega
2ª Galega
Copa Xunta

Escola de rugby[editar | editar a fonte]

Dende a tempada 2013-14 comezou a súa andaina coas categorías inferiores, grazas ó esforzo de algúns membros do equipo sénior. Posteriormente a escola pasou a mans da "Asociación Valentes - Club Deportivo Lobos", baixo a bandeira común de "Rugby en Compostela". Algúns dos equipos xa disputaron os seus primeiros partidos.

Rugby en Compostela[editar | editar a fonte]

En 2016 púxose en marcha a marca "Rugby en Compostela" baixo a que conflúen tres asociacións adicadas á práctica e difusión do rugby na comarca compostelá: o Santiago Rugby Club, a Asociación Valentes-Club Deportivo Lobos e o CDU Rugby Santiago Veteranos, que se reparten de común acordo as actividades segundo corresponda a:

  • Séniors (SRC).
  • Escola (Valentes).
  • Veteráns (CDU).

Terreo de xogo[editar | editar a fonte]

España vs Portugal en San Lázaro.
Gallaecius vs Muralla no campo de Nemenzo.

O terreo de xogo foi dende o comezo da súa historia un dos principais problemas que tivo que afrontar o club. Durante anos disputou os seus encontros como local no Campo de Nemenzo, situado nun contorno rural na parte norte do concello de Santiago de Compostela. En 2015 mudou a súa localía ó Campo de Marrozos, situado tamén a uns quilómetros da zona urbana da capital galega, esta vez a carón da estrada N-525 Santiago-Ourense.

Os adestramentos téñense levado a cabo tradicionalmente en instalacións da USC, tanto no campo de hockey (de herba) como no campo de fútbol (de area). En 2016 o concello concedeu permiso para que o club leve a cabo os seus adestramentos no campo de herba sintética de Conxo.

O Santiago Rugby Club ten usado outras instalacións municipais nas súas actividades extraordinarias. O torneo "Seven do Apostol" de rugby a sete lévase a cabo cada ano dende 2014 no Campo de Santa Isabel, no cal tamén se teñen celebrado concentracións de escolas de rugby de toda Galicia. No Campo das Cancelas téñense realizado xornadas de rugby escolar. O 21 de setembro de 2013 tivo lugar no Estadio de Atletismo da USC un torneo benéfico homenaxe ás víctimas do accidente ferroviario de Angrois coa participación de varios clubs españois, ampla presenza de prensa especializada e de algúns xogadores da selección española. Precisamente España xogou contra Portugal no Estadio Municipal de San Lázaro o 16 de marzo de 2013 diante duns 4000 espectadores. Este encontro foi organizado pola Federación Galega de Rugby coa axuda do Santiago Rugby Club.

As obras de reforma do campo de rugby da USC (popularmente "A Lixa" pola súa superficie abrasiva de area) comezaron en 2017 e a previsión é que sexa o terreo de xogo definitivo do club unha vez conte cun novo pavimento de herba artificial regulamentaria, un sistema de rego automático, proteccións perimetrais, iluminación artificial e unha parte da bancada cuberta.[16]

Uniforme[editar | editar a fonte]

Nos seus comezos como Gallaecius vestiu camisola azul celeste. Co cambio de nome cambiou tamén a uniformidade, pasando o Santiago Rugby Club a vestir camisola vermella e pantalóns negros.

Na tempada 2016/17 recuperou o amarelo como cor da camisola mantendo os pantalóns negros, recordando a uniformidade clásica do antigo Club Deportivo Universitario.

Directiva[editar | editar a fonte]

En setembro de 2016 a directiva do club quedou estruturada do seguinte xeito:

  • Presidente: José Pérez de Vallejo
  • Vicepresidente: Ramón Lamas Daviña
  • Secretaria: Marta Ríos Fandiño
  • Tesoureiro: Juan Parga Martín
  • Vocal: Jaime Leirós Alonso de Velasco

Adestradores[editar | editar a fonte]

  • Equipo masculino: Francisco López "Kiko"
  • Equipo feminino: Juan Rey "Mega"

Tempada actual[editar | editar a fonte]

O equipo masculino participou na segunda división da liga galega acadando un terceiro posto que lle permitiu xogar as semifinais da fase de ascenso.

LGR2
Táboa da LGR2 2017-2018
Posición Equipo Puntos Encontros Bonus
Xogados Gañados Empates Derrotas Ofensivos Defensivos
1 CR Fendetestas 62 14 13 0 1 9 0
2 CD Zalaeta 49 14 10 0 4 10 0
3 Santiago RC 42 14 8 0 6 6 2
4 Muralla RC 37 14 7 0 7 7 2
5 Pontevedra/Mareantes "B" 35 14 7 0 7 8 0
6 Vigo RC "B" 34 14 5 0 9 8 6
7 Barbanza RC 23 14 5 0 9 4 2
8 Ourense RC "B" 2 14 1 0 13 3 0

Sancións: Zalaeta (-1). Pontevedra Mareantes (-1). Barbanza (-3). Ourense (-5). Fendetestas (+1). Santiago (+2).

Semifinais:
Final:
LGF

As xogadoras do equipo feminino participaron na liga galega a través do CR Ferrol, acadando un cuarto posto na clasificación final.

Na Copa Xunta acadaron o subcampionato galego de rugby a sete.

Notas[editar | editar a fonte]

  1. Artigo no Mundo Deportivo (en castelán)
  2. Artigo en Marca (en castelán)
  3. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  4. Artigo en El Pueblo Gallego, na hemeroteca dixital Galiciana. (en castelán)
  5. Biografía de Fernando Calvet, en Cultura Galega.
  6. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  7. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  8. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  9. Artigo na web oficial domRC Deportivo (en castelán)
  10. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  11. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  12. Artigo en Hoja de los Lunes, na hemeroteca dixital Galiciana. (en castelán)
  13. Artigo en El Pueblo Gallego Arquivado 01 de abril de 2017 en Wayback Machine., na hemeroteca dixital Galiciana. (en castelán)
  14. Palmarés Nacional de clubs de rugby, na páxina oficial da Federación Española de Rugby. (en castelán)
  15. Clasificación da LGR2 trala derradeira xornada, na web do Bierzo Rugby Club (en castelán)
  16. A USC acometerá o acondicionamento do seu campo de fútbol e rugby en Compostela, no Xornal da USC.

Véxase tamén[editar | editar a fonte]

Ligazóns externas[editar | editar a fonte]

Traído desde "https://gl.wikipedia.org/w/index.php?title=Santiago_Rugby_Club&oldid=4909188"